فنون

بيت القافية..

"الفلاح الفصيح".. إلى الشاعر الكبير أحمد فؤاد نجم

الحلم لسه باقي 
وبكرة لسه أجمل
أوعاك يا مهر تدبل 
أوعاك يا نهر تقبل
 
صلاة الزين يا زين 
يا خيّال السنين
وصلت بالسلامة 
تصب لنا الحنين
نتوضا تطيب جروحنا 
ونرجع فرحانين
 
عيونك علمتنا
خدتنا وفهمتنا
الأرض أرض ابونا
والبيت دا يبقى بيتنا
وان الصمود وجود 
والغنوه من حياتنا
 
طبطبت ع النجوع 
والناي جوه الضلوع
فرشت السكة حنه
بالورد والشموع
الشعر شاب وأخضر 
دمّك من أي نوع
 
شريط الذكريات 
عروسة الحارات
ف تاجها ترن كلمة
الكلمة بنت حكمه
الحكمة تمحي ضلمة
ف ساعة الشدة لمه
نزيح دق السكات
 
جنينة ود كافيه 
تخللي اليأس يحلم
منين دا كله جابه
اقول الله أعلم
حكاوي تصير غناوي 
تفرح لحظة ما تإلم
 
وحشت عيون جناينك 
والنور والزعفران
وقلبك اللي ماسُه 
دفا وملفوف حنان
وصوتك اللي كاسُه
بيعزف ع الكمان
وكل النيل ما يشرب 
القلب يقول كمان
 
الحلم لسه باقي
وبُكره لسه أجمل
اوعاك يا مهر تدبل 
اوعاك يا نهر تقبل

(5 موضوع)

تعليقات القراء

لا توجد تعليقات على الموضوع