حياة

نواصل نشر الإنجيل باللغة العامية..

26- وفي كل المعابد كنت أعذبهم

1 وقال اغريباس لبولس مسموح لك انك تدافع عن نفسك وعلى كدا مد بولس ايده وابتدا يدافع ويقول 2 انا اعتبر نفسي سعيد يا ملك اغريباس لاني رايح ادافع عن نفسي النهاردا قدامك عن كل اللي بيشتكوا به اليهود على 3 وخصوصاً وانت عارف بكل العوايد والمسايل اللي بين اليهود وعلشان كدا اترجاك انك تسمعني وتطول بالك علي 4 انا عيشتي من صغري من يوم ما اتولدت وسط اهلي وفي القدس يعرفها كل اليهود 5 وهم يعرفوني من الأول ان حبوا يشهدوا لاني حسب مذهب عبادتنا الضيق خالص عشت فريسي



6 ودلوقت انا واقف باتحاكم على رجا الوعد اللي وعد الله به ابهاتنا 7 اللي قبايلنا الاتناشر اتمنوا الحصول عليه وهم بيعبدوا الله بكل الجهد ليل ونهار وبسبب الرجا دا انا باتحاكم من اليهود يا ملك اغريباس . 8 ليه يعتبر عندكم شيء ما يتصدقش ان كان الله يحيي ميتين؟ 9 انا شفت فى نفسىي بالحق اني لازم اعمل حاجات كتيره معاكسه لاسم يسوع الناصري 10وعملت كدا كمان في القدس وحبست فى السجون كتير من المسيحيين وانا واخد الاذن من عند رويسا الكهنه ولما كانوا بيقتلوهم كنت انا بادي صوتي معاهم 11 وفي كل المعابد كنت اعذبهم مرات كتيره والزمهم انهم يكفروا ولما كان يزيد غضبي عليهم كنت اضطهدهم للبلاد البعيده 12 ولما كنت رايح للغرض دا لدمشق باذن وتوصيه من رويسا الكهنه 13 شفت فى الضهر فى السكه ياجلالة الملك نور من السما اشد من نور الشمس نور حوالي وحوالين اللي كانوا وياي 14 ولما وقعنا كلنا على الارض سمعت صوت بيكلمني ويقول باللغه العبرانيه يا شاول يا شاول ليه بتضطهدني ؟ صعب عليك ترفس مناخيس



15 وقلت مين انت يارب ؟ قال الرب انا يسوع اللي انت بتضطهده 16 ولكن قوم وإقف على رجليك لاني علشان كدا انا ظهرت لك . علشان اعينك خادم وشاهد باللي شفته وباللي انا رايح اظهر لك  به 17 واخلصك من اليهود ومن الامم اللي انا عاوز ابعتك لهم 18 علشان تفتح عينيهم حتى يرجعوا من العتمه للنور ومن سلطة الشيطان لله وعلشان يتحصلوا على غفران الخطايا وياخدوا نصيب ويا اللي اتقدسوا بايمانهم بي .
19 وعلى كدا ياملك اغريباس ماكنتش معاند الرؤيا اللي من السما 20 ولكن اخبرت فى الاول اللي في دمشق وفي القدس وكل بلاد اليهوديه وكمان الامم انهم يتوبوا ويرجعوا لله ويعملوا اعمال تناسب التوبه 21 علشان كدا مسكوني اليهود في الهيكل وحبوا يقتلوني 22 ولكن لما اتحصلت على معونه من الله فضلت لحد النهاردا اشهد للصغير والكبير وما اقولش شيء غير اللي تكلم به الانبيا وموسى انه رايح يحصل 23 وان المسيح لازم يتألم وانه يكون هو اول اللي يقوموا من بين الميتين ويبشر بنور لليهود والامم ؟
24 وهو بيدافع بالكلام دا قال فستوس بحس عالي انت بتخرف يابولس . علمك الكتير خلاك بتخرف 25 لكن بولس قال له انا موش باخرف ياعزيزى فستوس ولكن انا باقول كلام الصدق المعقول 26 لان الملك يعرف الحاجات دي اللي انا با كلمه بكل حريه لاني ما اصدقش انه فيه شيء من دام خبي عنه لان الشي دا ما اتعملش في حته متداريه . 27 انت تآمن يا ملك اغريباس بالانبيا ؟ انا اعرف انك تآمن



28 وقال اغريباس لبولس بشيء بسيط تقدر تقنعني اني اصبح مسيحي 29 وقال له بولس انا كنت باصلي لله انه بقليل ولا بكتير موش بس انت ولكن كمان كل اللي بيسمعوني النهاردا يكونوا كدا زي ما انا من غير القيود دي



30 ولما قال كدا قام الملك والحاكم وبرنيكي واللي قاعدين وياهم 31 وانصرفوا وهم بيكلموا بعض ويقولوا ان الراجل دا ما عملش شيء يستحق الموت ولا القيود 32 وقال اغريباس لفستوس كان ممكن نسيب الراجل دا لو ماكانش رفع استئناف لقيصر 
 

اقرأ ايضاً

(20 موضوع)

تعليقات القراء

لا توجد تعليقات على الموضوع