تراث

من منشوراتهم..

مسجد العطارين.. أول جامع أنشئ في الإسكندرية منذ أيام الفتح العربى

محدش من الإسكندرانية ميعرفهوش.. هو واحد من أقدم المساجد الموجودة في الإسكندرية ان مكانش أقدمها على الإطلاق… وواحد من معالمها الإسلامية الهامة علي الرغم من الحداثة اللي طرأت عليه لكنه محتفظ بمكانه في قلب الإسكندرية وبمكانته في قلب كتب التاريخ مسجد العطارين …. اول جامع انشئ في الإسكندرية منذ ايام الفتح العربي.
كثير من الرحالة قالوا ان الجامع انشيء علي أطلال كنيسة قديمة عرفت باسم كنيسة أثناثيوس وأتعرف وقتها بالمسجد الشرقي واللي أمر بإنشائه كان عمرو بن العاص وكان عبارة عن مسجد صغير جدا.



وظل المسجد علي حاله لبداية العصر الفاطمي وبدأت تتهدم اجزاء كبيرة منه وفقد معظم معالمه وظل على هذا الي عام 477 هجرية حتى جاء الأمير الجيوشي بدر الدين الجمالي للإسكندرية ليخمد ثورة اشعلها ابنه الكبير مع اهل الإسكندرية وبالفعل اخمد الثورة وجمع من اهل الإسكندرية مبلغا كبيرا وجدد به المسجد.



وبالفعل اتجدد المسجد كله وأصبح مسجدا جامعا يعني تقام فيه خطبة الجمعة واتعرف وقتها باسم مسجد الجيوشي وفضل المسجد علي حاله الي عهد الأيوبيين وامر وقتها صلاح الدين الا تقام فيه خطبة الجمعة وبدأ يهمل المسجد لغاية لما سقطت معظم اعمدته وأغلق الي عام 1901 م إلى أن امر الخديو عباس حلمي الثاني بفتحه وتجديده واتجدد المسجد كله علي الطراز العثماني ومفضلش منه غير اللوحة التأسيسية لبدر الجمالي…. واتعرف من وقتها بمسجد العطارين بسبب سوق العطارين اللي كان موجود خلف المسجد "موجود لغاية دلوقتي "...



المسجد القديم اللي بناه بدر الجمالي كان شكله منتظم ويتوسطه صحن وعلى كل ركن من أركانه الأربعة مأذنة وكان فيه زخارف من الرخام والجرانيت المرصع بالفسيفساء
لكن المسجد الحالي مختلف تماما عن المسجد القديم…. المسجد الحالي مساحته مستطيلة وبياخد من الخارج شكل مثلث وله مأذنة واحدة وللمسجد واجهتان وبيتكون من طابقين الأول مخصص للرجال والثاني مصلى للنساء وزي ماقولنا المسجد مبني علي الطراز العثماني جوا المسجد فيه ضريح لاحد شيوخ الصوفية هو محمد بن سليمان بن خالد بن الوليد يقال انه يرجع نسبه لخالد بن الوليد…..



المسجد اكيد مختلف تماما عن المسجد الاصلي لكن ده ميمنعش انه يعتبر من اقدم مساجد الإسكندرية المبنية علي الطراز العثماني وانه واحد من اهم معالم الإسكندرية الإسلامية واللي هي الحقيقة مش كتيرر...

اللي حابب يزور المسجد.. المسجد مفتوح طول اليوم وهو مكانه بالظبط تقاطع شارع العطارين مع شارع فؤاد.

علا عبدالمنعم
مرشدة سياحية
 

تعليقات القراء

لا توجد تعليقات على الموضوع