تراث

كان ياما كان..

غزالة دياب (1-2)

بعد الرودة.. لمَّا رجع أبو زيد ياخد جيوشه ويروح يحارب خليفة الزناتى فى تونس, طبعا جاب الجيوش من نجد العريقة ..
وهوَّ ماشى حوَّد(1) على مصر, ومن مصر طلع على مرسى مطروح وكمَّل على السلوم لغاية(2) لما دخل ليبيا .
دخل على ليبيا وكمَّل لحد ما (3) وصل وادى اسمه وادى غدامس(4). 
ولمّا وصل وادى غدامس أبو زيد نادى فى الجيش: نرتاح هنا كام يوم.. عشان الخيل ترتاح والناس ترتاح والخيل تشرب. 
فلمَّا ارتاحت الجيوش طلع دياب لأبوه وقال له: يا اباه أنا طالع أصيد لي غزالة.. طالع أصيد لي غزالة.. 
فغانم قال لولده: طالع تصداد غزالة, يبقى تروح تشاور(5) أبو زيد الهلالى سلامة؛ فغضب دياب غضب شديد من أبوه وبص لأبوه بصَّه شديدة وقال له: إيه أشاور سلامة؟! 
ما هو أنا زيي زي(6) سلامة.. هوَّ أنا قليِّل؟ 
لأنُه فعلا دياب كان حامل النِدْ لسلامة (7) وأفضل من سلامة.. فطبعا قال له: أنا فارس زيي زي سلامة وأفضل من سلامة. 
أنا ماشاوِرش حد.. أنا فارس وليَّ وضعى فى بنى هلال.. وليَّ وضعى فى زغابى.. إزاى وأنا فارس زُغْبًة أطلع أشاور يا أباه؟!  إنتَ كلامك كده خارج القانون..كلامك دواتى(8) غير لايق.. 
دا أنتَ كمان شوية تقول للراجل اللى رايح ينام مع مرته روح شاوِّر سلامة.. 
(يقول للراجل اللي ناوي يروح ينام مع مَرَتُه (9) روح شاوِّر سلامة) هوَّ سلامة ده إحنا هنشاوره فى كل حاجه؟! محدش (10) عارف إن بنى هلال همَّا اللى قُدام ولا إحنا اللى ماشيين وراهم؟! همَّا فعلا دايما(11) قدامنا واحنا نمشى وراهم..
هوّ إحنا غاويين نمشي ورا بني هلال؟! إظّاهر إحنا عندنا هوايه نكون تابعيين لبنى هلال!.. كل حرب نروح فيها ورا سلامه؟! 
ودايما احنا زغبه بنبقى بعد بنى هلال.. هيَّ خلاص بقيت عاده عند زغبه إن لازم تمشى وراء بنى هلال؟!  منمشيش قدامهم أبدً؟! دايما اللى يمشى قدامنا هما بنى هلال.. فى السيطرة على الأمور.. 
(لكن في الحروب إحنا اللى متصدرين للموت اللي همَّا الزغابه) 
في معظم الحروب اللى كانت, الزغبه هيَّ اللي كانت بتحارب.. 
يعنى مثلا عندك: دياب فارس زغبه وعندك زيدان بن زيان برضو زُغبه ومعظم الفوارس اللى كانت بتحارب هيَّ أصلاً من زغبه.. وبنى هلال أصلا بتحارب بسيوف زغبة.. فهيَّ زغبة اللي متصدره (12) وهيَّ اللي بتجيب النصر لبنى هلال. 
وليه إحنا نرضى دايما أننا نكون ماشين وراء بنى هلال؟ 
إحنا دايما وراهم وهما دايما قُدام.. همَّا خلاص اتعودوا اننا إحنا نبقى وراهم وهما قدامنا؟! 
فطبعا غانم قال له: يا ولدى ماتزعلش(13) منى.. الكلمه دى مش ح تتكرر تاني.. 
فطلع مين ونفذ اللى فى دماغه من غير ما يرضى أبوه؟  ومن غير ما يسمع كلام أبوه؟ 
طلع(14) دياب.. طلع عشان يصيد غزاله ..
وهوَّ ماشى بالكحيلة, مشي لقى غزاله فضل(15) يدور يمين وشمال ورا الغزاله؛ لحد ما لقي(16) بير ميه, فقعد هوَّ والكحيله من التعب وشربت الكحيله وهوَّ شرب وقعد يصلى. 
طبعا صلى ركعتين وبص لقى العجوبة(17) نزلت له(18) - اللى هيا الغزالة دياتى الغزالة عجيبة -  ليه ؟
لأنها الشكل شكل غزاله بس تصرفاتها مش تصرفات غزالة. 
معروف إن الغزاله أوَّل ما تشوف الإنسان تطير(19), لكن دى فضلت تقرِّب مِنُه تقرِّب مِنُه تقرب مِنُه ..... لحد ما بقيت على سجادة الصلا اللي هوَّ بيصلى عليها. فطبعا دياب بعد ما صلى ركعتين ولسّه بيكمِّل الصلا راح مبطِّل(20) صلا وراح مادد إيده عشان يمسك الغزاله..
( ساب الصلا) 
راحت الغزاله طارت مِنُه فراح راكب الكحيله وراح طار (21) وراها ففضلت الكحيله تطير وهوَّ يطير وراها تطير وهوَّ يطير وراها تطير وهوَّ يطير وراها.... لحد ما طلعت فوق الجبال اللي نزلت منها.. أوَّل ما طلع فوق الجبال بص لقى تلات خيمات وبص لقى مش غزاله واحده؟!
دا لقى آلاف الغزلان!! 
وبص تاني لقي تلات خيام مليانين : خيمه فيها دهب، وخيمه فيها ياقود، وخيمة فيها مرجان وكل الخيام اللي مليانه كنوز دي, ومفيش أى حراس.
(ملقيش أى حُراس ملقيش إلاَّ الغزلان دول اللي موجودين) .
فجِه (22) نِزِل من على الكحيلة وجَرْ (23) سلاحه على إيده وبص جوّه الخيمة، دخل الخيمة فقعد يعبى فى طرف العباية شوية كنوز.. 
وهوَّ بيعبى سمع صوت واحده بتنوح وتبكى، لمَّا سمع المَرَه اللي بتبكى راح قايم ومسك سلاح ورفع طرف الخيمة وبص؛ لقى المَرَه دى مكتفة فى عمود الخيمة.. 
قال لها: يا ستى أهُه مفرَّج (24) الهم جالِك .
دُعاكي اللى بتدعيه لله – ما هي قاعده بتدعى ربنا بتقول: يارب أنا خالية من الكدب والزين ومتحكمش(25) فيَّ اليهودى.. دا أهلي ميعرفوش دلوخت(26) أنا فين.. يارب انجدنى وارسل من ينجدنى.. 
فطبعا راح متقدم لها دياب وقال لها: يا ستى أهو مفرِّج الهم جالك.. 
الغزلان اللى إحنا قلناها دياتى هيَّ مش غزلان انما هيَّ سحر مرصود .
بمجرد .... الغزلان دي تشتغل إزاي؟
 بمجرد يتفَك المربوط ده من عمود الخيمه, فالغزلان تحس بالمربوط دهواتى وتروح مِصَرِخَه(27) تِزَعِّق(28) وتُغَبِّر (29).. 
طبعا يروح جاي مين؟  جاي الكاهن. 
طبعا عرفته باسمها وقالت له: أنا هند بنت سالم من قبيله اسمها قبيلة بكر العربية.. أو من بني بكر.
وأنا طبعا قاعده فى عِز وآداب, وسط أهلى وناسى؛ إلا وهذا الرجل اليهودي الكاهن بعت لي مَرَه عجوز خدت حته من اترى ( يعني من ريحتها) يعني ممكن يكون منديل او إشَرْبْ أو جلابية.... أو أي حاجه يكون فيها عرقها .
وخدت الأتر (30) دوَّاتى (31) وراحت للكاهن والكاهن سحر لها . 
فضل ماشى قدامها وهوّ يخطط لها فى الأرض وهيَّ تمشى وراه لحد ما وداها الخيمة دياتى وراح رابطها وسابها.. 
بتقول: أديلى(32) تلات تيام وأهلى ميعرفوش مكانى.. أنا أديلى هنا تلات تيام واهلى ميعرفوش مكانى.. 
فقال لها: طيَِب ومين اللى مع الكاهن والكهنة دول اللي جابوكى؟ 
فقالت له: تلاته.. الكبير دا ساحر واسمه برهوق، والوسطانى دا فارس واسمه كدعوب، والصغير اسمه رابين. 
وعدد جيوشهم 60 ألف فارس.. 
برهوق الكبير الساحر عدد جيوشه 30 ألف فارس، وجدعوب الوسطانى عددد جيوشه 20 ألف فارس، ورابين الصغيَّر عدد جيوشه 10 تلاف فارس. 
فطبعا إيه؟ 
أوَّل ما دياب سمع الكلام دهواتى سحب سلاحه على إيده وركب الكحيلة وراح يدوِّر(33) على التلاتة.. 
فقالت له: على مهلك شوية.. إنتَ لو قعدت (34) عشرين يوم عشان تقدر تجمعهم(35).. مش هتقدر تجمعهم.. ومش هتقدر توصلهم نهائى.. إنتَ عايز تجمعهم و همَّا اللي ييجو لك لحد هنا ؟
قال لها: إيوَّه.
قالت له: حِل(36) الكتفات(37).. أوَّل ما تِحِل الكِتفات.. السحر هيتحرك.. الغزلان هتزعِّق وتغبِّر.. وهمَّا هيروحوا ظاهرين لك وجايين لك على طول. 
لكن لو دوَّرت وحدك من غير ما تحل الكتفات, لو دوَّرت عشرين يوم أو شهر مش ح تلاقي حد منهم واصل. 
فطبعا اتقدم لها دياب وراح حالل منها الكتفات. 
طبعا الغزلان مرصوده زي ما احنا عارفين..أوَّل ما حست بالسحر اتحرّك.. الغزلان راحت مِصَرِخَه وهاجت وماجت وراحت مغبِّره .
على طول أوَّل ما راحت مغبِّره راح ظهر اليهودى اللى هوَّ الأوَّلانى اللى هوَّ أصغرهم اللي إسمه رابين (اللى هوَّ معاه 10 تلاف فارس) أوَّل ما تقدم رابين راح قال إيه؟ 
مين اللى حل الأسيرة ؟  ومين اللى اتعدى على المال؟  إياك (38) يحسبوا المال دا من غير حراس.. ومحدش قاعد هنا واصل. 
فطبعاً طلع له دياب وقال له: يا كلب العيب قِلُه (39).. أنا اللي حليت الأسيرة.. وادى الحرب انزلها دي معاى.. والبطل يبان من فعاله.. وخدوا بعضهم ضرب لتنين.. زنقوا (40)ضلوع الركايب.. عقل العرب كان غايب.. فى نهار وسووها (41) ساعتين.. وعقل العرب كان غايب 
(طبعاً عقل العرب كان غايب على الغايب اللي هوّ دياب ده عشان غاب عنهم فتره ) فطبعا قعدوا يحاربوا لتنين فى الخلا الواسع خلاها(42).. وبينهم لمّا اتحنجل البين(43).. وجابوا في التراب وخلاها(44).. رابين أتا لُه بحربه.. أتى لدياب بحربه.. على كد نظره ماشايف.. وهبده (45) دياب بحربه.. هافت بواسع خلاها.. دياب أبصر عمل كيف؟.. طبعاُ ميَّل على رابين بالسيف.. ضربه ورماه ع الأراضي..
واللي اتقتل هنا مين؟  اللي اتقتل هنا رابين.  يبقى دياب قتل رابين.
طبعاً الـ 10 تلاف اللي ورا رابين حاوطوا مين؟  حاوطوا دياب.
قالوا له: يا بطل يازعيم القبايل.. يا بطل يا سبع يا غندور.. إحنا معندناش أمر نحاربك.. معندناش أمر عشان نحارب.. بس إحنا لازم نتحفّظ عليك.
إحنا لازم نتحفذظ عليك
لحد ما أخوه – ليه أخ تاني – لحد ما أخوه ييجي يحاربك.. لكن إحنا معندناش امر .
معندناش امر نحارب..
يبقى لازم تقعد معانا هنا؛ لحد ما يجي لك أخوه التاني، 
طبعا إيه؟  الغزلان الي ربطوها دي.. لمّا قتل رابين زاطت وهاجت وماجت وصرخت وغبَّرت..
فطبعا عرف الساحر، لمّا الغزلان هاجت وماجت تاني وصرخت وعشان السحر بتاعه شغّال عرف إن أخوه رابين مات.
لإنه لو ما ماتش رابين الغزلان ما كانتش هاجت وماجت ولا صرّخت، فعرف إن أخوه رابين مات.
فراح جاي التاني اللي هو مين؟  اللي هوّ جدعون.. جدعون لمّا جِه جِه بـ 20 تلاف يبقوا عشرين ألف فارس.
أوّل ما جِه قال: أين اللي قاتل شقيقي؟
طبعا لمّا قال كده أين اللي قاتل شقيقي؟  يبقى عرف إن أخوه مات.
أين اللي قاتل شقيقي؟  وأين اللي فك الأسيره؟
بمين لأجيبه شقين(46) أو أجيبه طبعا قطايع.
فظهر له طبعا دياب وقال له إيه؟
يا كلب العيب قِلُه.. أنا دياب ابن غانم.. وادى الحرب انزلها دي معاى.. والبطل يبان من فعاله .
وخدوا بعضهم ضرب لتنين.. زنقوا ضلوع الركايب.. فى نهاره سووها ساعتين.. ومالوا على بعض الركايب .
لما مالوا على بعض الركايب طبعا جدعون أتى لدياب بهرج (47), وراح متلافى دياب من بحر سرجُه ..
راح رافعه على إيديه وهزُه وراح رماه على ايه ؟  رماه ع الأراضى.
فلما هزُه ورماه على الأراضى، طبعا أمر الحُراس والفرسان يكتفوه، كتفوا دياب وربطوه مع الاسيرة.. وأصبح فى العمود مِكتَّف لتنين دلوخت.. دياب بن غانم وهند بنت سالم. 
طبعا لما اتكتفوا لتنين مع بعض فهند بكت. 
فقال لها: إنتِ بتبكى ليه يا نور العين يا أصيله؟ 
قالت له: والله دا وقت غداهم.. وفي وقت غداهم تمانين جلده يجلدوها لي كل يوم .  
كل يوم في الغدا(48) عند الجماعه دول يظهر تلت عبيد سود بالكرابيج.. وييجوا يغدونا تلاتين جلده على جسمي.
وطبعا بالنسبه للراجل ضعف المَرَه , يعني ياخد هوَّ 60 جلده، وطالما هوَّ بقي أسير معاها يبقى لما ييجوا العبيد يضربوها هيَّ تلاتين وهوَّ ستين.
فال لها: يا أصيله ..لمي غطاكي.. إن كان على التلاتين دول نضموهم، وبدال ما اخد أنا ستين آخد تسعين وأشيل عنِّك الجلد.
أوَّل ما ظهر العبيد قال لهم: إدونى أنا التسعين جلده واعفوا عن إيه ؟ اعفوا عن الأصيله. 
أتضرب دياب تسعين جلده ولمَّا أصبح الدم من جلده سايل.. 
فطبعا لمَّا اتضرب واتوجع دياب قعد إيه؟  قعد يبكى ..قعد يبكي ويقول: عدمت إيه؟ عدمت الحبايب.
يا هل ترى مين يبلِّغ أبو زيد بمكانه ويجيبه هنا لحد عندي؟.. يجيبه هنا يخلصنى(49). 
الوضع ده طبعا إيه ؟
صدم دياب فيه وصدمته شديده.. وقعد يدعي ربنا إنه ربنا ينجيه، فى الوقت ده كان باب السماء مفتوح فربنا قِبل دعاه.. فافتكره مين؟
افتكره أبوه غانم .
بص لقى ولده طلع يصيد غزاله غاب ما جاش. 
أربع تيام النهارده.. النهارده اليوم الرابع ..طبعا قلق.. قلق غانم.. راح على بيت دياب وقال: يا بت ابوكى مجاشى (لواطفة بنت دياب) يابنت ابوكى مجاشى.
فقالت له: والله يا جد أبوى أديله (50) أربع تيام خرج مجاشى. 
فلما عِرف كده راح لبيته, لمَرَتُه اللي هيَّ اسمها بذله بنت فايد. 
اللى هيَّ مَرَة مين؟  مَرَة غانم.. اسمها بذله بنت فايد.. وفايد ده من بنى هلال.. اللى منهم دريد.. اللى منهم حسن السلطان.. اللي طبعا إيه ؟  دياب خواله مين؟.. خواله بنى هلال.. لأن مَرَت غانم من الهلايل .
فراح لبذله بنت فايد قال لها: ولدك مجاشى .
قالت له: مجاشى ..
الواد لسَّه مجاشى.. 
من ساعة ما خرج للصيد مجاشى(51) وعوَّق. 
إنتَ روح بلغ مين؟ 
بلغ سلامة .
فطلع غانم علطول على مين ؟  طلع على خيمة سلامه.. فلقى بتُه (52) مين؟ 
فلقى بته بثينه.. ما هو متجوز بثينه بنت غانم .
فطبعا قعد يبكى لبثينه وقال لها: دياب خرج للصيد وأديله أربع تيام مجاشى.. مين قاعد وهوه بيحكى لبثينه ؟ 
قاعد أبو زيد .
فقال له: طيِّب يا راجل.. الراجل أديلُه أربع تيام خرج للصيد ولسه مفتكر تجينى. كنت فين من أربع تيام؟  ولاَّ أنا بعيد عنَّك.. 
شايفنى بعيد عنك وح تسافر لى سفر كبير عشان كده سبتنى لربع تيام مقولتليش. أربع تيام غايب ليه؟  ليه عدمتوا الحبايب؟ 
فبثينه قالت له: قوم يا أبو زيد.. 
قوم دوِّر على دياب عشان أبوه دموعه نازله.. 
راح أبو زيد أخد الركوبه وخرج يدوِّر على دياب. 
لمَّا خرج يدوِّر على دياب هيَّ الفرسه إسمها إيه ؟  إسمها الحمره وقول السمسارة اسمها إيه برضو؟ إسمها السمسارة.
دا لقب لكن هيَّ إسمها الحمرة.. وفرسة دياب اسمها الخضرة.. واسم الشهرة الشابة لانها كانت متعافية (52) شوية. 
خرج أبو زيد يدوِّر على دياب بالكحيله؛ لحد ما رَمَتُه المقادير(53) عد الميَّه أو بير الميه. 
طبعا أوَّل ما وصل لبير الميه؛ لقى نفسه تعبان وهوَّ كان صايم وكان يوم جمعه وصايم. 
وطبعا هوّ نِزِل شربت الكحيله وهوّ اتوضى وقعد يصلى.. أوَّل ما قعد يصلى نزلت له العِجوبه اللى هيَّ الغزال من فوق الجبال وقبت (54) جنبيه (55) وهوَّ بيصلى؛ لحد ما بِقِتْ قُدامه على فراش الصلا . 
طبعا أبو زيد فى عقل بالُه(56) وهوَّ بيصلى قال لها: إنتِ لا غزالة ولا تِعْرِفى أى غزال من الغزلان!!! إزاى تكونى غزالة وتقرِّبى؛ لحد ما تطلعى على الفرشان؟ 
إنتِ لو غزاله كُتِ (57) أوَّل ما لمحتى الكحيله كُتِ طرتى (58) ووليتى على الجبال. 
بس إنتِ لا غزاله ولا تعرفى أى حاجة عن الغزلان؟ 
فطبعا أبو زيد ما سابش نفسه(59) زى ما ساب دياب.. ما رّحش (60) مادد ايده ومسكها ولا جرى وراها.. لع (61).. كَمَّل صلاته فى خشوع تمام التمام، وبعد ما قام من الصلاه راح قال سّرَّج الكحيلة وقال لها: اطلعى.. وقعد يكلّم نفسه: تُوكُنِيْشْ(62) إنتِ إيه؟.. شافك ياك (63) دياب؟ أنا عارف إيه دياب.. لو شافك لازم إيه؟ لازم يحاول يصيدك وإنتِ وضعك (64) مش وضع غزاله. 
فمدام (65) شافك دياب وحاوَّل يصيدك.. يبقى إنتِ صيدتى دياب وودتيه (66) فى مكان. فين؟ 






اطلعى قدامى ورينى المكان , وريهوني (67) فين؟ 
طلعت الغزاله قُدامُه ..فضلت طالعه الغزاله وابو زيد وراها بالكحيله؛ لحد ما طلعت فوق الجبال وأوَّل ما طلع أبو زيد فوق الجبال.. إيه.. أوَّل ما طلع أبو زيد فوق لجبال بص لقى(68) غزلان كتيره قوي ...ولقى تلات خيمات. 
والخيمات دول زى ما قُلنا قبل كده مليانين من الدهب والياقود والزمرد والمرجان وكنوز كتيرة ومافيش حراس. مافيش(69) إلاّ الغزلان. 
فطبعا أبو زيد إيه؟ 
سحب السيف.. بص لقى انسان عما يناجى ربه، قرَّب لقى صوت دياب بيقول إيه؟ بيدعى ربه إنه يفك عنه الأسر والكَرْبْ اللى فيه, وعما يقول إيه؟  بيقول يا مين يغيتنى(70)؟ 
ويا مين يِدِل أبو زيد الهلالى على طريقى؟ 
فطبعا راح متقدم أبو زيد وقال: أهُه (71) مِفَرِّج الْهَمْ جَالَك ..
وراح قال له : ارفع يا أبو زيد طرف الخيمه عشان تشوفنى. 
رفع طرف الخيمه بص لقى إيه؟ 
لقي دياب مِكَتَّف فى عمود الخيمه, وجَنْبُه الصبيَّه اللى مِكَتَفَه جَنبُه.. اللي هيَّ هند بنت سالم من قبيلة بكر. 
فأبو زيد بيقول له: هوَّ إيه اللى جابك هنا ؟ وإيه اللي كَتَّفَكْ (72)معاها؟ 
ياك اللى ربطك كده بَلْوَّة الصبيه ؟..
دى أكيد الصبيَّه دى وراها بَلْوَى ..
وأكيد إنتَ جيت عشان تنقذها, فقال له: يا هلالي لا أزيد ولا أقِلُه ..هيَّ طبعا هذه الصبيه تبقى هند بيت سالم, همَّا الجماعة سحروها وجابوها هنا ..وأنا خرجت أصيد غزاله.. فالغزاله جِرْيِتْ وجْرِيْتْ وراها لحد ما جابتنى هنا(73).. 
ولمَّا جِيْتْ (74) أخَلِّصْهَا (75) طبعا بعد ما خلَّصتها وجيت افك الكتفات (76) جُه التلاته اليهود السحره ..
اليهودى الأوَّلانى اللي إسمه برهوق وده ساحر كبير وعدد جيشه تلاتين ألف فارس، والوَسْطَانى وده الفارس اللى فيهم وإسمه جدعون وده عدد جيشه عشرين ألف فارس، والصغيَّر وده اللى أنا مَوَّتُه فعدد جيوشه كانت عشر تلاف فارس. 
وأوَّل ما تِحِلْ الكتافات يظهر لك التلاته دول. 
فطبعا راح متقدم أبو زيد وفك كِتَافَاتْ دياب والصبية، طبعا أوَّل ما اتفكت الكتافات.. السحر اتحرك.. راحت الغِزْلانْ هرجوا ومرجوا وزعقوا وغبَّروا.. 
فطبعا حس الكاهن جدعون فجه جدعون فقال: اللى فكوا الكتافات ياَكْ همَّا اللى قتلوا شقيقى؟ 
قَصْدُه على رابين 
ومين اللى فك الأسيرة؟ مين ؟ بالله لاجيبه شقيقى..( اجيبه نصين ولا قطعتين) ..
فطبعا راح طالع له أبو زيد وقال له: يا سافل العيب قِلُه.. آدى البلى (77) وآدى الميدان.
جمعها المؤلف من الراواي السيد توفيق، مدرس عربي بمدرسة بني زيد الإعدادية المشتركة، مواليد 1968م، متزوج وله بنتان وولد، يروي السيرة الهلالية كاملة، المكان: قرية بني زيد الأكراد/ مركز الفتح/ محافظة أسيوط. تاريخ الجمع: 2006م.
حوَّد: مرَّ.
لغاية: إلى أن.
لحد ما: إلى أن.
غدامس: مدينة ليبية تقع في واحة بالقرب من تونس والجزائر, تتبع محافظة ريان الليبية, وتبعد عن العاصمة طرابلس بحوالى 600 كيلو , يبلغ عدد سكانها حوالى 25 ألف نسمة, كانت مركزا تجاريا قديما مهما على الطريق الممتدة من ساحل المتوسط إلى الصحراء الأفريقية, وتتمتع هذه المدينة بهندسة معمارية تقليدية مذهلة ... وتزين البيوت بأشكال وألوان بديعة مازال الأهالي يحتفظون بها حتى الآن.
تششاوِّر: تأخذ رأي.
زي: مثل.
حامل النِّد لسلامة: ليس بأقل منه.
دوَّاتي: هذا.
مَرَتُه: زوجته.
محدش: لا أحد.
دايما: دائماً.
متصدرة: تتصدر أو تتقدم الحرب.
ما تزعلش: لا تغضب.
طلع: خرج.
فضل: ظل.
لقي: وجد. 
العجوبه: الغزالة العجيبة.
نزلت له: هبطت له من الجبل.
تطير: تهرب.
مبطِّل: أنهى صلاته.
طار: جرى.
فجِه: جاء.
وجَر: رفعه.
مفرِّج: مزيح.
متحكمش: لا تحكِّم.
دلوخت: هذا الوقت.
مصرِّخه: تصرخ.
تزعق: تنادي بصوت مرتفع أو تصرخ.
تُغبِّر: تثير الثرى أو التراب.
الأثر: الأثر, والمقصود قطعة قماش أو منديل أو أي شيء فيه رائحته.
دواتي: هذا.
أديلُي: أعطي له.
يدوِّر : يبحث.
قعدت: ظللت.
تجمعهم:تجدهم.
حِل: فك.
الكتفات: الحبال الذي تم تكتيفها بها.
إياك: للتنحذير.
قِلُه: خفه أو امنعه.
زنقوا: أتعبوا ضلوعها.
سووها: قضوا أو استغرقوا.
خلاها: الخلاء.
اتحنجل البين: ظهر ظهرت علامات الموت أو القضاء عليه.
خلاها: جعله مرميا على الأرض.
هَبَدُه: ضربه.
شقين: نصفين.
بهرج: بزعيق.
الغدا : الغداء.
يخلصني: ينقذني ويحررني.
أديله: منذ.
مجاشي: لم يأت.
بتُه: بنته.  
متعافيه: شديدة وقوية.
المقادير: الأقدار.
قبَّت: ظهرت .
جنبيه: بجواره.
عقل بالُه: في سره, والمقصود حدث نفسه.
كُتِ: كنتِ.
طرتي: هربتي.
ما سابش نفسه: تحكم في نفسه.
ما رحش: لم يذهب, والمقصود لم يفعل.
لع: لا.
توكونيش: ماذا تكوني.
ياك: يا ترى.
وضعك: تصرفك.
فمدام: طالما.
ودتيه: ذهبتِ به.
وريهوني: دعيني أراه.
لقي: وجد.
ما فيش: لا شيء.
يغيتني: ينقذني.
أهُه: ها هو ذا.
كتَّفك: ربطك.
جابتني هنا: ذهبت بي إلى هذا المكان.
جيت: جئت.
أخلِّصها: أحررها.
أفك الكتفات: أفك الروابط أو الحبال.
البلى: البلاء.

 

(81 موضوع)

تعليقات القراء

لا توجد تعليقات على الموضوع