تراث

من عديد السيرة الهلالية (2-2)..

عديد دوابة على أبيها عامر الخفاجي

 (15)
قالت دوابة يا بنات بنى هلال
مين يبكى معاى بِكِراة(1)
واللى يبكى معاى النهاردة
لازم أبكى معاه بُكراة(2) 
والبين حوّم عليَّ
ويتمنى وأنا بنت بِكْرْ(3)
ويتمنى وانا بِكْرَاه(4)
شيعت لدياب قال ما جاى النهاردة
ولا بُكراه 
1- بِكِراه: بأجر أو بمقابل.
2- بُكراه: غدا. من يبكى معى اليوم أبكى معه فيما بعد.
3- بنت بِكر: عذراء.
4- بِكراه: البكرية أى كبيرة إخوتها.
 
(16)
أمانة عليك يا مشرّق على جِدى درغام
على رباية العز تقولوا لي
دوابة رباية العز
باعة عُقدها اللولي
راهنة الحجولي(1) 
وتخدم بنات العرابة(2)
1-الحجولي: مفرد حجل، وهو نوع من أنواع الحلى من الفضة تلبسه النساء عند الساق فوق كعب القدم.
2-العرابة: العرب.
 
(17)
قوم قالت دوابة سايق عليكم النبي(1) 
ياك(2) يا عرب ماراتوش(3)
وحدوه
لا إله إلاّ الله
يوم مطاوع ما ضرب أبوى بحربة
فى ضلوعه القُصر 
ماراتوش 
يا شايل النعش قول لى 
دا دياب ما دريان(4)
صاحبه ما شافوش
قوم دياب يحلف يمين
وتابعُه يمينين
فى تار أبوكى يا دوابة ما هيكفينى ألف 
ولا ألفين
ورحمة النبى الزين
ليه مده عن العين
حبيب روحى يا ناس ما راتوش
1-سايق عليك النبي: أسوق عليك النبى المقصود أتوسل بالنبي.
2-ياك: للتعجب والاستغراب.
3-ما راتوش: لم تروا.
4-ما دريان: لا يعلم بالأمر.
 
(18)
قالت دوابة وِزْ العراق حطحط على النخلاه(1)
يرعى مراعى الجزيرة 
فيها عود الحشيش ما خلاه(2)
أبوى رباية عز
وأكله دقيق العلامة(3)
خالى السِنْ والنخلاه(4)
طاطى يا وز العراق
واسمع لتعديدي
أنا رُحت أسلّم على "الداز"(5)
قالت شيلى إيدك يا دوابة لتعدى كمان إيدي
صبحت أبكى على أبوى حبيبي
أسد الردال عضمه فى الترى(6) نخلاه(7)

1-نخلاه: النخل والمقصود أن وز العراق كان يحلق عليه ولا يتركه أثناء سيره.
2- ما خلاه: لم يخلو منها.
3- دقيق العلامة: الدقيق الفاخر.
4- النخلاه: النخالة، الخشن بعد تحليل الدقيق.
5- الداز: الجاز أو الجازية.
6- الترى: التراب.
7-نخلاه: مثل النخالة أو التراب الناعم.
 
 
(19)
قالت دوابة آهين وشالات(1) 
سحبت تيران النية
فى نجع العرب وشالات(2)
ومالت على الطين 
خدت قدرها وشالات
وقالت من ميتة أبويَّ
ما لقيت حَد عزانى (يعزينى فيه)
دا آنا من عز أبويّ
كانت الراس ع الزانى (الزان)
خليت من دارك يا اباي
قوم جِسِر غريمك
دخل الدار عزاني
دخل عزاني
وانا قلبى عليك وشالات
 
1- شالات: للتعبير عن كثرة الحمول والهموم.
2- شالات: حملت أو شالت.
 
(20)
قالت دوابة
بناتكم يا عم دياب
ناوين على عندي(1)
ع يلبسوا خواتم دهم
ولابسين فى الايدين عَندي(2)
وعيغيروا اللبس يا عم دياب
وناوين على عَندي
دا ابوى كان صاحبك يا عم دياب
وعيب عليك السر
دا انا ابكى على أبوى يا عم دياب
واتحزّم عليه بالسِر 
دا انا ما انسى أبوى يا عم دياب
ولو غطت عينى دِل(3)
1- عندي: عنادى أو معاندتي.
2- عندي: عنادى أى غوايش.
3- دل: الذل والمهانة.
 

 
(21)
قالت دوابة:
ياق ميتة أبوى يا عم دياب
جاتكم سبب طبتوا(1)
نسيت أبوى يا عم دياب
اللى كان يقج منُه المِسك والطيبتوا(2)
من ميتة أبوى يا عم دياب
ما لقيتكم فى الميدان طبتوا(3) 
دا أبوى كان صاحبك يا عم دياب
ويعيد عليك السِر
دا كان مصلى صاحب دين
وكانت سبحتُه ها اليسر
ضربه مطاوع على غفلة
قوم ضربت فى الضلوع القُصر
وإن ما كنتش عارف طريق القصر 
من قبلى دهب طوبته

1- طبتوا: تطايبتوا وتصالحتوا فيما بينكم.
2- الطيبتوا: الطيب أو العطر.
3- طبتوا: نزلتوا الميدان.
 
 
 
(22)
دياب يقول يا دوابة
عملها الخامسى وأهاليه
وان آذن الله لأحضر دفنته وأهيل عليه
وإن آذن الله لأحضر دفنته وأهاليه(1)
وابحت لى دوره دوينه(2)
بالتراب واهاليه 
(أهيل عليه)
أنا أبو موسى ولى فى السجر(3) غابة 
واحلف يمينين آجى ظاهر ما اجيش غابة(4)
وكل من داق حربتي
يقضّى طول العُمر ما يلقلهاش ولا طابه(5)
ومات كبير الزغابة
عمّا تشرقوا كفا تيه(6)
والفرح يبقى لدوابة
فى نجع العراق واهاليه(7)
 
1- أهاليه: أهيل عليه التراب.
2- دوره دوينة: جورة أى حفرة عميقة.
3- السجر: الشجر (استبدال حرف الشين بحرف السين).
4- غابة: المقصود متخفى وغائب عن الأعين.
5- طابه: شفاء.
6-كفا تيه: كيف أو أينما تكونوا.
7- أهاليه: أهله وناسه.

اقرأ ايضاً

(84 موضوع)

تعليقات القراء

لا توجد تعليقات على الموضوع