تراث

من منشوراتهم..

"أماكن تراثية اتهدمت في الإسكندرية"

- مبني الاتحاد الاشتراكي "البورصة القديمة/ بورصة القطن"..
وده مكانه كان في المنشية وتحديدا في الجهة الشرقية من ميدان القناصل اللي معروف دلوقتي بميدان محمد علي او ميدان سانت كاترين ...المبني ده كان عبارة عن قصر لقنصل يوناني واتبني سنة 1866 واتحول بعد كده علشان يكون اول بورصة للمضاربة ولبيع القطن في الاسكندرية وفي نفس المبني كان فيه مقر مكتب الاشراف الصحي "الأورناطو" وكمان مكتبة عامة فيها اكتر من 8 الاف كتاب ...سنة 1926 المبني اعاد تطويره علي ايد 3 معمارين من اشهر واشطر المعماريين الفرنسيين وفعلا المبني أعاد بناءه علي الطراز الايطالي اللي كان متميز واجهته بالاعمدة الرخامية الضخمة والساعة الكبيرة اللي زينتها الارقام اللاتينية ..البورصة فضلت موجودة ومزدهرة لغاية ثورة 1952 واللي اتحول بعدها المبني لمقر حزب الاتحاد الوطني وبعد كدة مقر للاتحاد الاشتراكي وده نفس المكان اللي خطب فيه عبد الناصر خطبة التأميم واضرب عليه نار فيه ....اتحرق جزء من المبني سنة 1977 في انتفاضة الخبز ..وبدل مانرممه ونطوره اتهد سنة 1984 واتحول لجراج للعربيات.. ايوة جراج... 
 
 
 
- فيلا امبرون:
الفيلا دي موجودة او كانت موجودة في شارع المأمون في محرم بك بناها المهندس المعماري "بيل ايرك" وكانت ملك لواحد من اغني التجار الايطاليين وهو "امبرون" ...الفيلا اتبنت سنة 1920 علي الطراز الايطالي وكان اهم مايميز تصميمها الفريد من نوعه هو برج يشبه ابراج حصن بابليون مش بس كدة الفيلا دي اهميتها الحضارية والانسانية اهم بكتير من اهميتها الاثرية... الفيلا دي سكانها واحد من اهم واشهر ادباء الادب الانجليزي واللي كتب رباعية الاسكندرية وهو "لورانس درايل " 
 

- فيلا اجيون "قصر زينب هانم الوكيل":
فيلا "جوستاف اجيون " ..في وابر المياه... الفيلا دي كانت من تصميم المعماري الفرنسي" اوجست برييه" وده اول مهندس معماري استخدم الخرسانة في بناء المباني.. اتبنت عام 1922...الفيلا دي اهميتها مش بس الطراز المعماري الفريد من نوعه ولا الاشكال الهرمية في الزخرفة وحمام السباحة اللي كان فيها ولا النباتات النادرة اللي كانت في حديقة الفيلا ....لأ الفيلا دي كانت هي المبني الوحيد الباقي من اعمال بيريه في مصر اصلا...الفيلا اترفعت من لجنة حفظ التراث عام 2012 واتهدمت كلها عام 2014.
 
علا عبد المنعم
مرشدة سياحية

تعليقات القراء

لا توجد تعليقات على الموضوع